Şöyle kim bi dil ü bi can olmuşam
Kendü ahvalime hayran olmuşam
****
Gâh beni ben bilmezem kim kandeyem
Gâh cem ü gâh perişan olmuşam
****
Gâh oldum binişan ü gâh banişan
Gâh nişansız mülke Sultan olmuşam
****
Gâh ferişteh olmuşam gâhi peri
Gâh div ü geh Süleyman olmuşam
****
Gâh oldum Şeyh Sanan-ı zeman
Gâh tersa geh müslüman olmuşam
****
Gâh bulut olup hevaya ağmışam
Gâh katre gâh umman olmuşam
****
Gâh hevadan yağmur olup yağmışam
Gâh nebat ü gâh hayvan olmuşam
****
Gâh od u su yel ü toprak fert fert
Gâh tıyn gâh tıynda pinhan olmuşam
****
Gâh ısı geh soğuk gâhi i’tidal
Gâh damarlarda girip kan olmuşam
****
Söyleyen hem söyleten her natıkı
Tenlere can cana canan olmuşam
****
Gâh mescid gâh sacid gâh sücud
Gâh deyr ü gâh ruhban olmuşam
****
Gâh saki gâh sagar gâh mey
Gâh esrük gâh mestan olmuşam
****
Gâh Türk ü gâh Arap gâhi Acem
Gâh Hindu gâh Yunan olmuşam
****
Gâh kış u gâh yaz u gâhi bahar
Gâh bülbül gâh gülistan olmuşam
****
Gâh cism ü gâh cevher geh araz
Gâh maadine girip kan olmuşam
****
Gâh berr ü gâh bahr ü geh serab
Gâh imaret gâh viran olmuşam
****
Gâh zemin ü geh zaman gâh asüman
Geh zemanı döndüren ben olmuşam
****
Gâh Tur u gâh münacat gâh musa
Gâh Firavn gâhi Haman olmuşam
****
Gâh irad gâh mürid ü gâhi murad
Gâh küfr ü gâh iman olmuşam
****
Gâh düzeh gâh muazzeb geh azab
Gâh cennet gâh rıdvan olmuşam
****
Gâh renc ü gâh renclü geh tabib
Gâh nale gâh efgan olmuşam
****
Gâh bu cümlesinden oluram beri
Ne melek ne cin ne insan olmuşam
****
Eşrefoğlu Rumi’yem ben kim bugün
Kesret ü vahdette yeksan olmuşam
****
Ben Süleyman-ı zemanım kuşdilim
Söylerem âlemde destan olmuşam
****
Nisbetim yok masivallaha benim
Bir beş on gün bunda mihman olmuşam
****
Şahinem şahım şikare gelmişem
Bu bişede gör ne arslan olmuşam
****
Saydımı aldım yine döndüm şaha
Varuben Şehbaz-ı şahan olmuşam

Eşrefoğlu Rumi