Yâ Resûlallah yüzün nûruna hayrân olmuşuz
Düş olaldan ‘aşkına hâk ile yeksân olmuşuz

Nûş idelden şol gönül bezminde sahbâ-yı gamın
Bu harâb-âbâd olan ‘âlemde vîrân olmuşuz

Âsitânıñ topraġında bulalı kühl-i cilâ
Hamdülillah nâzır-ı dîdâr-ı Rahmân olmuşuz

Açılır ezhâr-ı envâr-ı cemâlin her nefes
Hâr-zâr-ı cism içinde hoş gülistân olmuşuz

Biz senin derdinle timâr ideriz haste dile
Hâşe lillah gayrı bir cûyâ-yı dermân olmuşuz

Hakkıyâ ednâsıyız şol ümmet-i merhûmenin
Lîk ol şâh ‘aşkına hizmetle sultân olmuşuz