Olmışuz biz tâ ezelden çünki ‘uşşâk-ı Hudâ
Gönlimizde sâkin olmaz hîç bizim hubb-ı sivâ
****
Nefsine itme kıyâs Hallâk-ı ‘âlem kulların
Sû’-i zan idüb dime ‘uşşâk-ı Hakka eşkıyâ
****
Evliyâ var kubbeler altında kim zühhâd hemân
Göricek anları dirler zümre-i ehl-i lazâ
****
Gizlenürler pes sıfât-ı nâs ile Hak dostları
Yiyüb içüben uyurlar kimse bilmez sûfiyâ
****
Fâsıkın buğzı hemân zâhirde olan fıskına
Zâtına it hüsn-i zan dime cahîm ehli ana
****
Kendini yüce tutarsan Hak seni alçak ider
Cümle halkın alçağıyam dir-isen devlet sana
****
Sâlikin ‘ışk-ı mecâzîsi riyadan yeğ imiş
Şirk-i mahfı bil muhakkak eyleme hergiz riyâ
****
Münkirin inkârına bakub sakın bulma fütûr
Ehl-i zikr ü ‘ışka sen olgıl muhib Kuddûsîyâ

Ahmed Kuddusi