Pâdişâhım derde düşdüm bana bir dermân meded
Derde dermân ıssı mürvet sâhibi sultân meded

Çâresizem tâkatım kalmadı kaldım âh u zâr
Hazretinden uma geldim lutf ile ihsân meded

İhtiyâc oldum bugün bir katre vaslın meyine
Anca teşne dillere feyz irgüren ‘ummân meded

Hasret ü firkat ipiyle bendi muhkem eyleyüp
Türlü mihnet kılmak ister bana bu zindân meded

Sakla bu gönül sarâyın pâdişâhım kıl nazar
Kılmasın nefsim çerisi hâk ile yeksân meded

Bir safânın altına gördüm komuşlar bin cefâ
Meyl ider nefsim bükülmez senden ister cân meded

Dâ’mâ bizden hatâ senden ‘atâdır işlenen
‘Aşkı fazlından müyesser kıl bize burhân meded

Bu fenâ evden göçüp Hazretine varmaklığı
Ol Habîbin hürmetiyçün kıl bize âsân meded

Cürmüne Ümmî Sinân’ın zerrece inkârı yok
Dâimâ eydür mürüvvet sâhibi gufrân meded

Ümmi Sinan