Ruhun pertev-fürûz-ı nûr-ı Hakk’dır yâ Resûlallah
Tecellîden kamer-veş iki şakdır yâ Resûlallah

Vücûdun mushaf-ı esrâr-ı Hakk’ı câmi’dir
Hakîkat bin bir isme mâ-sadakdır yâ Resûlallah

Cemâlin matla’-ı hurşîd-i envâr-ı tecellîdir
Tamâm âyîne-i Rabbü’l-felakdır yâ Resûlallah

Senin levh-i cebîninden okurlar ‘ilm-i esmâyı
Sana Hakk’dan “fe evhâ” hoş sebakdır yâ Resûlallah

Kelâmın metn-i câmi’dir ki anda münderic esrâr
Senin her harfin el-hak sad varakdır yâ Resûlallah

Şefâ’at bulmağa senden sebeb cürm-i günâh ise
Kamudan Hakkı-yi mücrim ehakdır yâ Resûlallah