Vücûdun ne biter cân olmayınca
Yaraşmaz şehre sultân olmayınca

Kuluyla sultânın mertebesine
Varılmaz lutf-ı ihsân olmayınca

Eğer bu kimseye kısmet değildir
Delîl eyyâm-ı devrân olmayınca

Kaçan biter bu gül vahdet bâğında
Meziyyet kâmil insân olmayınca

Murâdı ma’lûm olmaz bu beyânın
Sıfât-ı dût bu düşmân olmayınca

Ey bu vahdet bâğına yol bulanlar
Bir olmaz katre ‘ummân olmayınca

Kaçan gelsin dile bu dürr-i vahdet
Anın gönlünde bu kân olmayınca

Gel ey vahiy bilen bir nazar eyle
Delîl olmaya bürhân olmayınca

Melekût bâğçesindeki tâvûslar
Yaraşmaz ahî cevlân olmayınca

Küfr kaçan kosun yakanı elden
Senin maksûdun îmân olmayınca

Kaçan âşikâr oldu cân vücûdda
Vücûdu külli vîrân olmayınca

Şehidlik mertebesine irişmez
Bu ‘aşk yolunda kurbân olmayınca

Yahyâ menziline kaçan irişsin
Anın gözleri giryân olmayınca

Yâ ne bilsin nedir Mesîh dimeklik
‘Îsâ nefesli ol cân olmayınca

Ne bilsin ‘ilmini Eflâtûn’un ol
Refîki yolda Lokmân olmayınca

Mürüvvet bâzârında kabûl olmaz
Delîli Şâh-ı Merdân olmayınca

Bal ü yağ helvâ derdine düşdü gönül
Hoş olmaz derde dermân olmayınca

Yine nazlandı bu Kaygusuz Abdâl
Yimez helvâyı büryân olmayınca