Gel ey bâd-ı sabâ lûtfeyle bir dem
Haber ver bize cânân illerinden
Beşâretle bize kıl şâd-ü hurrem
Haber ver bize cânân illerinden

Aradım nice yıl kevn-ü mekânı
Bulunmadı anın nâm-u nişânı
Aceb nice bulur isteyen anı
Haber ver bize cânân illerinden

Seherde açılan güllerde midir
Yâhut efgân eden dillerde midir
Akan suda esen yellerde midir
Haber ver bize cânân illerinden

Ol ilden azmedinde bu cihâne
Tamuya uğrasan döner cihâne
Teselli ver kulûb-ı âşıkâne
Haber ver bize cânân illerinden

Harîm-i kuds-i lahûta varırsın
Saray-i hâs-ı cânânı görürsün
Yine azmeyleyip bunda gelirsin
Haber ver bize cânân illerinden

Nesîm-i feyz-i akdes bahr-i cûdun
Havâdisten mukaddestir vücûdun
Cemâl-i zât-ı a’lâdır, şuhûdun
Haber ver bize cânân illerinden

Eğer bir cân ise hüsnün bahâsı
Nice bin cân anın olsun fedâsı
Niyâzî’nin kadîmi aşınâsı
Haber ver bize cânân illerinden