Gelmişem vahdet elinden aşk ile cihâne ben
İçmişem câm-ı ezelden olmuşam mestâne ben
Rabbenâ vağfirlenâ zünûbenâ verhamlenâ

Çünki “kerremnâ benî âdem” dedi Kur’ân’da Hakk
Âyine-veş sûret oldum cism ile ol câna ben
Rabbenâ vağfirlenâ zünûbenâ verhamlenâ

Gönlüme nûr-i tecellî dost cemâlinden doğar
Şem’ine pervâne oldum aşka yâne yâne ben
Rabbenâ vağfirlenâ zünûbenâ verhamlenâ

Çünki bu sevdâyı yazmış dest-i kudret bâşıma
Anınçün yok karârım düşmüşem cevlâne ben
Rabbenâ vağfirlenâ zünûbenâ verhamlenâ

Ey Sinânî aşk makâmı bes rızâ-yı Hakk dürür
Pâdişâhın hizmetinde durmuşam dîvâne ben
Rabbenâ vağfirlenâ zünûbenâ verhamlenâ