Dost cemâli şem’inin pervânesidir cânımız
Anın içün ol Muhammed nûrudur îmânımız

Çün Muhammed nûruna mazhar yaratdı lâ-yezâl
Tevhîd-i zât-ı ilâhîdir bizim burhânımız

‘Âleme geldik bugün illâ ki infâk olmadık
Cân gözünden görünen oldur bizim seyrânımız

‘Ayn ü şîn ü kâf ile geldik cihâna bî-gümân
Anın içün gayret-i Hakk’dır bizim erkânımız

Ehl-i kâl insâna değil yokdur ana sözümüz
Ehl-i hâl ‘âşıklara söyler bizim ‘irfânımız

Ehl-i hâlin sırrını fehm eylemez nâdân olan
Dört kitâba “lâ” diyendir iblîs ü şeytânımız

Evliyâ bâbındadır ‘ilme’l-yakîn hakka’l-yakîn
Mustafâ sırrından alır dersini mihmânımız

Âyet-i Rahmân’a uyduk hamdülillâh çok şükür
Ten ü dilden cân u dilden zikr olan Sübhânımız

Der Sinân Ümmî bize mürşid olan “Hû”dur hemân
Evvel âhir bahriyiz “Hû”dur bizim ‘ummânımız

Ümmi Sinan