Didi bir gün pend idüp bana dedem
Ey püser gel yarın içün yime gam
İbn-i vakt ol virdin olsun dem-be-dem
Dem bu demdir dem bu demdir dem bu dem

Yime ferdâ gussasın ey nâ-halef
Nisye içün eyleme nakdin telef
Çağırup dir düblek ü şeştâ vü def
Dem bu demdir dem bu demdir dem bu dem

Sâkıyâ gel sun şerâb-ı hoş-güvâr
İçelim gam gussa olsun târumâr
Gün bu gündür yarının da ıssı var
Dem bu demdir dem bu demdir dem bu dem

Sen sen ol şol dem ki geçdi dem deme
Ana hem dem diyene hemdem deme
Ey refîk irmez bilirsin dem deme
Dem bu demdir dem bu demdir dem bu dem

Çün kefîl oldu sana ol Zü’l-Celâl
Yime müstakbel gamın çekme melâl
Ehl-i hâl ol Hayretî gel ehl-i hâl
Dem bu demdir dem bu demdir dem bu dem