Abdullah Tamamlar-Hikayei Münasibi Hal Li Abdillah İbni Abdilmuttalib
Gördü bir hâtun anın bir kez yüzün
Vâr iken anda cemâl-i mâh-ı dîn
Çün yüzünde gördü ol nûrdan ziyâ
Yırtdı iffet perdesin gitti hayâ
Kendüyi arz itdi Abdullâh’a ol
Dedi Abdullâh ana yerinde ol
Ger murâdınsa zinâ çün ey degâ
Başa gitmek olur ol olmaz revâ
Ger helâl vech ile olmaksa murâd
Dur yerinde tîz gelem ey hoş-nihâd
Tîz yüğürdü hânesine ol hümâm
Âmine tapusuna virdi selâm
Kim Resûl’ün olacakdır ânesi
Bu sadefdir ol anın dürdânesi
Çünkü Abdullâh’ı gördü nûr ile
Düşdü pes mihr-i mahabbet cânına
Gâlib oldu rûhuna Nûr-ı Resûl
Tâlibi cem’ oldu vü buldu vusûl
Düşdü ol sâ’atde nîsân-ı kerem
Ol sadef cevfine oldu muhterem
Katre iken oldu pes dürr-i yetîm
Dürretü’t-tâc oldu ol misl-i adîm
Anasına itdi çün nûr intikâl
Buldu Abdullâh cebîninden zevâl
Tiz yüğürdü va’desine ol kerîm
Buldu ol hatunu ol yerde mukîm
Didi geldim va’deye virgil cevâb
Didi hâtun ana ey merd-i savâb
Sen değildin va’de itdiğim kişi
Ol güzeldi kanı anın cünbüşi
Vâr idi anın yüzünde bir ziyâ
Ol ziyâya cân ile başım fedâ
Gitmiş ol nûr şimdi senden n’eyledin
Anı kankı yerde zâyi’ eyledin
Didi ehlim katına vardım bu dem
Didi ol devlet anınmış ben n’idem
Ben o nûra ‘âşık idim ey cüvân
Çünkü gitmiş var işine sen hemân
Sanma kim ter-dânem olam ey selîm
Kim benem ‘iffet harîminde mukîm
Çok-durur böyle hikâyet bî-şümâr
Söylenirse söz uzar bulmaz karâr
1Abdullah Tamamlar
Sitemizde sanatçıya ait toplam 50 eser bulunmaktadır. Sanatçının sayfasına gitmek için tıklayın.
Yorumlar
Henüz yorum yapılmamış.