Hakk vücûdum katresin deryâ-yı ‘ummân eyledi
Zerre iken nûrumu hurşîd-i tâbân eyledi

Hicr ile giryân iken ol lutfu çok Kâdir Hudâ
Vaslını idüp müyesser beni handân eyledi

Kulluğa lâyık değil bir bende-i ‘aciz iken
Mahz-ı fazl u lutfu ile gör ki sultân eyledi

Pâre pâre eylemişken gam-ı kesret sînemi
Merhem-i vahdet ile derdime dermân eyledi

Kimine dostlarının nûrunu seyrân eyleyüp
Kimine düşmenlerin nârın gülistân eyledi

Olmuş iken Bîçâre’ye benliği muhkem hicâb
Kaldurup ol lutfu çok kendin nümâyân eyledi