Ey şahîd-i mukaddes hurşîd-i âlem-ârâ
Geysûlerin muhammes ebrûlerin dilârâ

Zülfün teline kıymet olmaz cihan ser-â-ser
Neşr eylemiş dü-kevne mûyin anber-i sârâ

Ey nûr-i Hak Muhammed sûre-i”Vẻ’d-duhâ” da
Vasf eylemiş seni Hak ta’rîf eder Teâlâ

Âyât-ı beyyinâtda ism-i şerîfin Ahmed
Bütün âleme rahmet gönderdi zât-ı Mevlâ

Bu mevcûdât vücûdu mevcûduna sebebsin
Ey me’haz-i hidâyet ey dergeh-i muallâ

Ey sultân-ı selâtîn ey âlim-i bevâtin

Ey hâtem-i risâlet ey matla-i tecellâ

Ey hurşîd-i şefâ’at gözler seni her ümmet
Ey merkez-i seâdet senden budur temennâ

Vîrânı ma’mûr eyle mahzûnu mesrûr eyle
Ey maden-i hidâyet mürdeyi eyle ihyâ

Bu ümmet-i Muhammed halk olmadan mukaddem
Va’d eyledin şefâ’at şefâ’atin müheyyâ

Esrâr-ı “Kabe kavseyn” kıldı seni mübeşşer
Kerîm ismine mazhar menzil-gehin “Ev ednâ”

İlm-i ezelde sâbit nâm-ı pâkin Muhammed
Ey Mahmûd-i Teâlâ inda’llah kadri vâlâ

Biz ümmet-i Muhammed şöhretiyle halk olduk
Bu nâmı bizden alma mübeşşer-i Feterdâ

LUTFÎ kapunda el-yevm bir bende-i alîldir
Ey menba-i merâhim merhametindir ibkâ