Bir bâde doldur sâkıyâ vecde gele peymâneler
Câmlar cilâ versin zıyâ raksa gele mestâneler

Göster şerâb-ı eynemâ bahşet hayât-ı innemâ
Meyhânedir dâr-ı devâ âkıl ola dîvâneler

Ey sâkî-i bezm-i elest gözler seni bâde-perest
Sermestlere ol dâd-rest pür-nûr ola dilhâneler

Ey sâkî-i cân nerdesin kaldır basîret perdesin
Sâkî şerâb âverdesin ma’mûr ola vîrâneler

Bülbülleri gül dalına ruhsâr-ı gülün âlına
Kandır meyin zülâlına gözler döke dürdâneler

Sâkî gülistân-ı dile neyzenleri olsun bile
Görülmemiş bir dem ola yüz göstere cânâneler

Bir zülf-i zerîn nâzenin kamer-nümâyiş meh-cebîn
Sâkî olan olur emîn LUTFÎ güzel meyhâneler