Kemâle irmeġe insânda isti’dâd lâzımdır
Tarîka girmeğe evvel kişide zâd lâzımdır

Bu nakş-ı ma’rifet her levhde sûret-pezîr olmaz
O nakşa ma’nâda bir hâme-i Bihzâd lâzımdır

Halîfe olmağa bu mekteb-i ‘âlemde tıfl-ı dil
Ana ‘ilm-i hakâyık öğretir üstâd lâzımdır

Siyâset-gâh-ı dehr içre kesilmez nefs-i emmâre
Serinde darb-ı tevhîd ile bir cellâd lâzımdır

Eğer bûstân-ı ‘âlemde ser-i servin ire ‘arşa
‘Ubûdiyyet makâmında dime âzâd lâzımdır

Bugün ehl-i fenâya ‘âlem-i fânîde ey Hakkı
Ne şân u şöhret ü ne halk içinde âd lâzımdır