Sûreti geç ‘âlem-i ma’nâya ir
Ko sivâyı Hazret-i Mevlâ’ya ir
Terk idüp ednâyı gel a’lâya ir
Geç sivâdan matlab-ı a’lâya ir

Revzen-i cânın açılsın ez-safâ
İrişüp bî-vâsıta nâm-ı Hudâ
Mahv idüp zenb-i vücûdu bul bekâ
Geç sivâdan maţlab-ı a’lâya ir

‘Âkil oldur eyleye fikr-i meâl
“Men ‘aref” sırrın bilen bulur kemâl
Emr-i “mûtû”ya idegör imtisâl
Geç sivâdan Hazret-i Mevlâ’ya ir

Aldanup kalma nükûş-i kesrete
İrmeğe kasd eyle nûr-ı vahdete
Tâlib ola cân u dilden vuslata
Geç sivâdan maţlab-ı a’lâya ir

‘İbret ile itsen eşyâya nazar
Vahdet-i zâtiyyeden virir haber
Vâr ise ‘ayn-ı basîretden eser
Geç sivâdan matlab-ı Mevlâ’ya ir

‘Âmil-i ‘ilm-i şerî’at ol beğim
Kâmil-i râh-i tarîkat ol beğim
Vâsıl-ı sırr-ı hakîkat ol beğim
Geç sivâdan Hazret-i Mevlâ’ya ir

Bülbül-âsâ idegör cûş u hurûş
Kıl muhabbet câmını gül gibi nûş
Eyledinse “men ‘aref” sırrını gûş
Geç sivâdan matlab-ı a’lâya ir

Kulluğun ‘âbid ider dâim hisâb
Olıserdir zâhide zühdü hicâb
Kıldı ‘ârif ey Fenâyî feth-i bâb
Geç sivâdan Hazret-i Mevlâ’ya ir