Bir kâkül-i gülçin teli zîn rûy-i gülistân
Bagbân ile bostân
Bir ruhleri al lâle misâl rûy-i nûr-efşân
Cennât ile Rıdvân

Bir çesm-i câdû haller-i hindû kad-i bâlâ
Gayetce dilârâ
Bir kebkeb-i per serv-i revîş eyledi devrân
Kıldı bizi hayrân

Bir mâh-ı muzayyâ görünür vech-i müdevver
Gün gibi münevver
Bir sîret-i nûr sûret-i hûr kudret-i Rahmân
Dilberlere sultân

Bir âfet-i cân sûh-i zemân hûr-i kıyâfet
Gör ki ne kıyâmet
Bir nûr-i ezel hulk-i güzel husn-i firâvân
Ammâ yine insân

Bir kipriği ok gözleri nergis ruh-i lâle
San dolu piyâle
Bir lebleri kevser gül-i ahmer bûy-i reyhân
Derdlilere dermân

Bir sîm-beden dürr-i Aden tâze gül-endâm
Gökden bize ikrâm
Bir sâki-i mey mazhar-ı Hay şem’a-i rindân
Hoş meşreb-i mestân

Bir rûha gıda kalbe cilâ câm-ı mücellâ
Pek kadr-i muallâ
Bir sırr-ı Hudâ nûr-i atâ âleme ihsân
Eyledi O Mennân

Bir nazlı nezâketli güzel misli bulunmaz
Onsuz hiç olunmaz
Bir bülbül-i cân rûh-i revân merkez-i îmân
LUTFÎ sana kurbân