Gûş-dâr ol hûş-mendim şerî’at akvâline
“Es-sahiyyü habîbu’llah” bak hadîs meâline

Men-yetevekkel alâ’llah sırrına serdâr olup
Bul kanâat kenzini yapış sehâvet dâline

Fakr içinde bul gınâ müstağnî ol ey merd-i şîr
Ab-ı rûyin katresin verme cihânın mâline

Dergeh-i Mevlâ’ya dilden kıl münâcât arza ver
Râzı ol ilm-i ezelden taksîmin nevâline

Bâb-ı abdi dak eden sâil olur dâim fakîr
Her dü-âlemde fakîrdir bak Resûl’ün kāline

Sâilân meyân-ı nâsda hor hakîrdir dâima
Kes gözün kılma nazar sen bir ehad emvâline

Devlet-i dünyâ seni ta’kîb ederse sâye-veş
Ol zemân ızhâr-i nimet et Hudâ ebdâline

Zevk-ı nefsin terk ederek sor fakîrler hâlini
Hayder ü Fârûk gibi bak eytâmın ahvâline

Çâr civâran kıl nazar noksân-ı cîrânı gözet
Allah içün nâzır ol her gün gedâlar hâline

Kuş gibi derüp deşürüp kendi yavrun besleme
İnsâfın var ise bir bak ehl-i hâl efâline

Rağbet etmez er olan kerkes gibi bil cîfeye
Ankā-veş konar o meh-rû bir seâdet dâline

Aç yatar çul-pûş gezer etmez tenezzül merd-i şîr
Ağzını vurmaz süâlin bu zehirli bâline

Pek müreccahdır yanında evliyânın LUTFİYA
Fakr ile eyler tefahhur bakmaz ednâ yâline