Nûr-i ayn-i Muhammed’dir
Şâh-ı merdân Hayder Ali
Dürr-i deryâ-yı Ahmed’dir
Şâh-ı merdân Hayder Ali

Esedu’llâh-ı Gālib’dir
Rızâu’llâh-ı tâlibdir
Hubb-i sivâdan tâibdir
Şâh-ı merdân Hayder Ali

Erenlerin merdânesi
Bahr-i irfân dürdânesi
Şem’-i hüdâ pervânesi
Şâh-ı merdân Hayder Ali

Bezm-i seâdet çırâğı
Mihr-i hidâyet durağı
Lübb-i risâlet kırağı
Şâh-ı merdân Hayder Ali

Aliyyü’l a’lâ harfidir
Hasen Hüseyin zarfidir
Cemâl-i cânân zülfüdür
Şâh-ı merdân Hayder Ali

Gül-i gülbün-i hüdâdır
Ezelde şîr-i Hudâ’dır
Hakkın yolunda fedâdır
Şâh-ı merdân Hayder Ali

Velâyet gül-gülistânı
İlm-i vahdet debistânı
Ali’dir cedd-i Geylân î
Şâh-ı merdân Hayder Ali

LUTFÎ sür yerlere yüzler
Bu yolda olsun bu gözler
Kevser’in başında gözler
Şâh-ı merdân Hayder Ali