Devredip geldim cihâna yine bir devrân ola
Ben gidem bu ten sarâyı yıkılıp virân ola

Cûş edip ummân-ı can cismim gemisin dağıda
Yerler altında tenim toprak ile yeksân ola

Bu vücûdum dağı kalka atıla yünler gibi
Şeş cihâtım açıla bir haddi yok meydân ola

Dört yanımdan nâr u bâd u âb u hâk ede hücûm
Benliğim anlar alıp bu varlığım tâlân ola

Dağıla terkibim otuz iki harf ola tamam
Nokta-i sırrım kamunun cevherine kân ola

Cümle efkâr u havâssım haşr ola bu arsada
Kalkalar hep yeniden san kim bahâristân ola

Yevm-i tüblâdır o gün her ma‘nâ bir sûret giyer
Kim nebât u kimi hayvân kimisi insân ola

Kabrime dostlar gelip fikredeler ahvâlimi
Her biri bilmekte hâlim vâlih ü hayrân ola

Her kim ister bu Niyâzî derdemendi ol zamân
Sözlerini okusun kim sırrına mihmân ola