Hudâyâ râhımız irgür visâle
Meded yâ Hakk meded yâ Hayyu Kayyûm
Çeküp kullarını semt-i kemâle
Meded yâ Hakk meded yâ Hayyu Kayyûm

Şefâ’at eyleyüp sultân-ı kevneyn
Açılsın cân-ı dilde cem’-i bahreyn
İçir ol kevseri gitsin hicâbeyn
Meded yâ Hakk meded yâ Hayyu Kayyûm

Bu kalbin dîdesini pür ziyâ kıl
Harîm-i gülşeninde âşinâ kıl
‘İnâyet irişüp vaslın ‘atâ kıl
Meded yâ Hakk meded yâ Hayyu Kayyûm

Visâlin ka’besinden al hicâbı
Cemâlin gülşeninden aç nikâbı
İrişüp bulalım ni’me’l-meâbı
Meded yâ Hakk meded yâ Hayyu Kayyûm

Hidâyet eyle ef’âl ü sıfâta
‘İnâyet kıl dahi tevhîd-i zâta
Raûfî kulunu bâkî hayâta
Meded yâ Hakk meded yâ Hayyu Kayyûm