Ey xizmetkarê Quranê
Şagirdê hebs û zîndanê
Te pir dert dît li jiyanê
Şehîdê me Hecî Mûsa

Te hilgirt barekî giran
Wekî betlê berê Îslam
Stêrka te li asîman
Birayê me Hecî Mûsa

Ji bo Xwedê te kir xebat
Li ser derdan te kir sebat
Şehîdî ji te re bû heyat
Mêrxwasê me Hecî Mûsa

Îslam her evîna te bû
Quran her birîna te bû
Şehadet xwezîya te bû
Egîdê me Hecî Mûsa

Merd û mêrxwas xwedî soz e
Şîrhelal û xwedî doz e
Rêwîyê da‘wa pîroz e
Şehîdê me Hecî Mûsa

Sînga xwe da êş û derda
Da‘wa Îslam qet berneda
Hetta umrê xwe di ber da
Şehîdê me Hecî Mûsa

Xebata te ji bîr nabe
Tê her dem li ber dilan be
Serê te li ser gulan be
Şehîdê me Hecî Mûsa

Ji şerefan Îslam bes e
Ji rêwîyan re Quran bes e
Lîbasa şehîdî bes e
Şehîdê me Hecî Mûsa

Ey Nisêbîna birîndar
Ka egîdê xwedî qerar
Rehmet li ser te be her car
Şehîdê me Hecî Mûsa

Em bi te pir serbilind in
Em ê doza te her hildin
Hûn bi mertebeyek bilind in
Şehîdê me Hecî Mûsa

Bûne hedef her du bira
Bi derba evan xwînxwara
Şehadet xelat ji te ra
Şehîdê me Hecî Mûsa

Şehadet mizgînek xweş e
Dermanê dilê biêş e
Wek misk û amber bêhn xweş e
Şehîdê me Hecî Mûsa