Vahdet-i ‘aşkı taleb kıl mâ vü menden it firâr
Bir ‘adeddir ki merâtibden olur deh sad hezâr

Bahr-ı ‘aşk içre kamu ervâhdır yek-renk lîk
Buldu bu tenler zurûfundan bu kesret i’tibâr

Zarf-ı nâhoşdan olur telh-âb-ı şîrin revân
Ger hoş olmak istersen ol âşinâ-yı cûybar

Kışrdandır dâne-i engür ü nârın kesreti
Asr olunsa cümle birdir şîre-i engür ü nâr

Olmak istersen gönüllerde sürûr u gözde nûr
‘Akl-ı dûnu ko hemân kıl ‘aşk-ı pâki ihtiyâr

Âşinâ-yı ‘aşk olursan devlet-i sermed senin
Nakd alırsın her murâdın sende kalmaz intizâr

‘Aşk ile fânî olursun ârif-i âgâh isen
Fâriğ u âzâd olursun kalmaz aslâ i’tizâr

Yâr-ı gârın sendedir her ne dilersen sen sen ol
Aç elin tut dâmenin kıl kendini bûs u kenâr

Sen sana gel sen seni bil kimsin ey Hakkı sen
Sayma cismin kim gönülden gâr-ı yâr u yâr-ı gâr