Gönül ‘aşkında nâ-pervâdır ey dost
Seni sevmek ‘aceb sevdâdır ey dost

‘Adû bilmez bu ma’nâyı ki dâim
Dil ü dîde sana me’vâdır ey dost

Cemâlin arzu eyler kamu eşyâ
Cihân pür-şûr ü pür-gavgâdır ey dost

İkilik perdesi ref’ oldu dilden
Dü ‘âlemden gönül yektâdır ey dost

Çü gelmez hâtıra pervâ-yı ağyar
Gönül şûrîde vü şeydâdır ey dost

Eğerçi rütbe-i ‘akl oldu ‘âlî
Makâm-ı ‘aşk hem a’lâdır ey dost

Cihân lezzetlerin buldum çü helva
Velî ‘aşkın mey-i ahlâdır ey dost

Şuûnun seyr ider ‘âlemde ol cân
Ki çeşmi ‘aşk ile bînâdır ey dost

Çü sensin evvel ü âhir sırr u zâhir
Bu Hakkı hîç ü nâ-peydâdır ey dost