Gördükçe hâl-i zârını mahbûb ider ihsân sana
Terk it hevâ-yı ‘ıyşını lutfeylesin cânân sana
Sarf itme zâyi’ vaktini virmez şifâ seyrân sana
Ey derde dermân isteyen yetmez mi derd dermân sana
Ey râhat-ı cân isteyen kurbân olan cândır sana

Bezm-i me’ârifden seni yok eylemiş bu vârlığın
Mahzâ bu yüzdendir senin cânândan ağyârlığın
Öldür şu nefs-i serkeşi öğren tarîkın bârlığın
Yağma idersen varlığın gider gönlünden darlığın
Mahv eyle sen ağyârlığın yâr olısar mihmân sana

Nây u mey-âsâ herkese fâş itme söz ü sâzını
Kesret evinde görme sen ikrâm ile i’zâzını
Pervâne-veş yek-renk olup bir eyle şem’-i nâzını
Tevhîde tapşır özünü kimseye açma râzını
Şeyh izine tut yüzünü şeyhin yeter burhân sana

Şeytân’a uyma ey civân lutf eylemez aslâ yılan
Hâb-ı tegâfül elverir yol üzresin artık uyan
Râh-ı sevâba ol revân itme tereddüd bir zamân
Sermâye bu yolda hemân teslîm olur buna inan
Sıdk ile Allah’a dayan itmez mi gör ihsân sana

Aşk u hevâdan vir haber derd-i ser-i gavgâyı ko
Pîr-i mugâna bende ol İskender ü Dârâ’yı ko
Mahbûbu tut ağyârı ko a’lâyı tut ednâyı ko
Dünyâ ile ‘ukbâyı ko ûlâ ile uhrâyı ko
Var ol kuru sevdâyı ko matlab yeter Sübhân sana

Oldukça hâdim nefsine râm itme sen dildârını
‘Aşk âteşini yakmadan germ itme sen bâzârını
Zühd-i riyâdan tevbe it ey bilmeyen reftârını
Cândan taleb kıl yârını vir cânı bul dîdârını
Yok eyle kendi vârını kim vâr ola cânân sana

Vardıkda pîr-i kâmile taş olsa dil yumşağ olur
Firavn ise nefsin yakın bir mûrdan alçağ olur
Oldunsa vâkıf ‘aczine ednâ ‘amel bir dâğ olur
Çürüklerin hep sağ olur zehrin kamu bal yağ olur
Dağlar yemişli bağ olur cümle cihân bostân sana

Pervâne-i bîçâre-veş cân u ciğer dağlar isen
Aşkın bilirsin feyzini ol dem eğer hûşyâr isen
Ben şimdi açık söylerem sen de işit bîdâr isen
Kulluğa bel bağlar isen şâm u seher ağlar isen
Sular gibi çağlar isen tîz bulunur ‘ummân sana

İhlâs evinde eylemez te’sîr tesbîh u sivâk
Mahbûb arar ister diler bir pâk-bâz-i derdnâk
Es’ad gibi sen de hemân iki cihânda itme bâk
Yüzün Niyâzî eyle hâk derd ile kıl bağrını çâk
Kalbin sarâyın eyle pâk şâyed gele sultân sana