Cân gözün aç gör ki yine ol Kerîm-i kâr-sâz
Niçe kıldı fazlı birle kahrı lutf u kışı yaz

Cümle mahlûkât u her şey dün ü gün ol
Hâlık’a dillü dilince kılurlar şükr ü tesbîh ü niyâz

Germ ü râhat geldi oldu mu’tedil âb u hevâ
Serd ü zahmet gitdi girü kalmadı kış u ayaz

Sebz-pûş oldu bugün etrâf-ı ‘âlem ser-te-ser
Revnâka geldi ‘Irâk u Rûm u Çîn ü Şâm Hicâz

Yine gökden yir yüzüne saçdı rahmet yağmurun
Her nebâtâtı getirdi hilkate ol bî-niyâz

Bu kamu ölmüş ağaçlar nâgehân oldu diri
Kûh u sahrâ vü cihâna irdi hâtifden âvâz

Subhdem gönül kulağın tut çemenden yana kim
Başladı kuşlar dilinden söylenir ol gizli râz

Bize dirler kim ganîmet görün işbu demleri
Kim niceler niçe yıllar bu safâyı bulamaz

‘Ömrünüz nevrûz u çiğdem bigi kûtehdir velî
Fikriniz kaddi çınâr u servi dalından dırâz

Hüdhüd ü kumru göğercin tûti vü dürrâc ile
Tutdular meclis içinde her biri bir dürlü sâz

Kimi ‘uşşâk u nevâda seyr idüp kılur nüvaht
Kimi nevrûz-ı ‘acemde çağırur kimi hicâz

Murg-ı zâr içinde tâvûs nâz ile cevlân ider
Şâdumân olup sularda oynar ördek birle kaz

Bu kamu kuşlar hevâda dem-be-dem pervâz urur
Her biri saydın kovar sungur u şâhin şâh-bâz

Ol Ganî her bağçede açdı çü kudret bohçasın
Bir gelin gibi donanup geydi gûn-a-gûn cihâz

Nesrin ü gül-nâr açıldı nergis ü reyhân ile
Gel teferrüc kıl bu mevsimi ey yâr-i pâk-bâz

Sünbül ü sûsen benefşe erguvân u lâle hoş
Lîk güldür cümlesinin arasında ser-firâz

Gül güle karşu açılup hoş bezendi gülsitân
Bülbüle karşu kılurlar her biri bin ‘izz ü nâz

Bülbülün nâle vü derd ü gulgulü çok olduğu
Şol sebebdendir ki olur güllerinin ‘ömrü az

Her bahâr u şâdînin sonu hazân u gam durur
Gırre olma işbu pendi tut gönül levhinde yaz

Nakş-ı sun’a mâil olma Sâni’ ü Nakkâş’ı sev
Kim bekâ oldur bu fânî ol hakîkat bu mecâz

Gerçi her bostân u bâğın bâğıbânı bir durur
İllâ hergiz bir değil hurma vü engûr u piyâz

Bu bahâr-ı bâğ-ı ‘ömrün hâsılı esmârıdır
Tâ’at u zikr ü tilâvet tevbe vü savm u namâz

Zihî kul kim hâcesi emrinde sürer ‘ömrünü
‘Aklı koyup nefse uyup bir nefes buyruk sımaz

İrmedi hasret kışının yazına Ümmî Kemâl
Ol sebebden bağrı başlu gözü yaşlu benzi sâz

Fâ’ilâtün fâ’ilâtün fâ’ilâtün fâ’ilât
Fâ’il-i muhtâr kimdir ol Kerîmü kâr-sâz