Zevk-ı dünyâya muhabbet nice bir
Lezzet-i fânîye rağbet nice bir
Nice bir ‘âdet ü bid’at nice bir
Nefs-i şirrîre itâ’at nice bir
Mâye-i ‘ömrü izâ’at nice bir

Nice bir ‘ömr-i ‘azîz ola telef
K’olımaz cümle cihân ana halef
Cevheri yere urup alma hazef
Nefs-i şirrîre itâ’at nice bir
Mâye-i ‘ömrü izâ’at nice bir

Ger Hüdâyî’den alırsan haberi
Viregör Hakk yoluna cân ü seri
Kalmasın zenb-i vücûdun eseri
Nefs-i şirrîre itâ’at nice bir
Mâye-i ‘ömrü izâ’at nice bir