Bu kesret milkine cânâ gönül virme fenâdır hep
Bekâ iklîmine ir ki sivâ hubbu hebâdır hep

İki ‘âlem vücûdu kim ana âyînedir vechin
O yüzde görünen ancak yine nûr-ı likâdır hep

Kadîmî âşiyânına ‘urûc itse nola bülbül
Hezârın güllere zârı visâline recâdır hep

Bir avuç hâk iken itdin ‘ademden çün bizi insân
Zuhûr-ı cümle mevcûdât cenâbından ‘atâdır hep

Düşen sevdâ-yı zülfüne nider pes gayrı sevdâyı
Visâlin bezmine cânâ dil ü cânı fedâdır hep

Hudâyâ levh-i hâtırdan rusûm-ı gayrı hakkeyle
Görünen sûret ü ma’nâ yine lutf-ı Hudâ’dır hep

Bulursa şems-i zâtından Fenâyî nola nîm zerre
Kamuya mebde’ ü münşî Hüdâyî’den du’âdır hep