Müjde müminler size ihsân-ı Rahmân’dır gelen
Şânını tâzîm edin bu mâh-ı gufrândır gelen

Ondadır feyz-i hidâyet ondadır afv ü kerem
Kadrini bil mevsîm-i inzâl-ı Kur’ân’dır gelen

Iyd-i ekber her günü kadr-i mübarek her gece
Ehl-i îmâna ne mutlu lutf-i Sübhân’dır gelen

Zulmet ü kasvetden âzâd etmeye sâimleri
Nûr-i İslâm nûr-i îmân nûr-i irfândır gelen

Hâne-i kalbi temizle hoşça istikbâl için
Nîmeti mebzûl bir mihmân-ı zî-şândır gelen

El-hazer senden şikâyet etmesin yarın amân
Rûz-i mahşer şâfi-i ashâb-ı isyândır gelen

Rahmet ü gufrân hedâyâsıyla cennet bahşeder
Derde dermân vasl-ı cânan ıtk-i nîrândır gelen

Mâsivâdan sâim ol Remzî dilersen vasl-ı Hakk
Râh-ı aşkı kullara talîm-i Yezdân’dır gelen