‘Âlimin ‘ilmi gerekdir ‘ilm ü ‘irfân üstüne
‘Ârifin sırrı gerekdir ‘arş-ı Rahmân üstüne

‘Âşıka hakka’l-yakînden görünür tevhîd-i zât
Sâlike seyrân gerekdir hûr u gılmân üstüne

Dü cihân deyyârının ahvâlidir şerh etdiğim
Tâlibe Rahmân gerekdir câna cânân üstüne

Kâmil insânın kemâlin söylerim anlayana
Himmet ü burhân gerekdir kâmil insân üstüne

Fahridir ‘âşıkların ma’şûk elinden yarası
Derdine dermân gerekdir hükm-i Lokmân üstüne

Hakka bâtıl hânesinden geçmeyen âdem nedir
‘Âşıka evtân gerekdir ‘ayn-ı îmân üstüne

Ey Sinân Ümmî senin sırrın şâha mahrem-durur
Ermeğe merdân gerekdir açma nâdân üstüne

Ümmi Sinan