Anlasın insân-ı kâmilden sıfâtı bilmeyen
Rûhdan bir ‘ibret alsın nûr-ı zâtı bilmeyen

Mecma’u’l-bahreyni mikyâs eylesin idrâkine
Râz-ı bahreyn-i vücûb u mümkinâtı bilmeyen

Kenz-i mahfî râzın itsin cism ü cânından hesâb
Cevher-i gencîne üzre tılsımâtı bilmeyen

Düşde görsün hâbda seyr eylesin mâhiyyetin
Hâlet-i berzahla ahvâl-i memâtı bilmeyen

Mâsivâllaha perestişden teyakkun eylesin
Deyr içinde secde-i Lât u Menât’ı bilmeyen

Süllem-i evveldedir kasd-ı ‘urûc eylerse de
‘İlm-i gaybîsiyle ma’nâ-yı salâtı bilmeyen

Kâlıb u kalb u bekâ-hîzinden olsun müstefîd
Haşr u neşr ile müfâd-ı kâinâtı bilmeyen

Ma’nâ-yı hatt-ı siyâh-ı hâmemi fehm eylesin
Zulmet içre çeşme-i âb-ı hayâtı bilmeyen

Eylesin ey Şems isr-i evliyâya iktifâ
Vâdî-i hayretde minhâc-ı necâtı bilmeyen