Âşık cânına ‘aşk koyan ol bir yüce Sübhân imiş
Cânım içinde bulmuşam cânlara dahi cân imiş

Sevdik yâridir Mustafâ andan ola meyl ü vefâ
Sıdkı bütün gönlü safâ hem bize ol îmân imiş

Halk içindir bu dil sözü gönüldedir dostun râzı
Gönül dosta söylediği ne dir ise Kur’ân imiş

Bir dem gönüle kayıkdım ol gizli varaka bakdım
Uş sırrımı halka çakdım bir pâyânsuz ‘ummân imiş

Gelin ‘ummâna dalalım isteyüp gevher bulalım
Satalım sarrâf olalım zîrâ tükenmez kân imiş

Eğer bizden almazsanız siz satınız biz alalım
Zîrâ bizim bu gönlümüz sermâyeli dükkân imiş

Ol dükkân açılmadığı kokusu saçılmadığı
Sırrının açılmadığı kilidi kibr ü kîn imiş

Çün kibrin boynunu ezdin hırs evini bile bozdun
Dükkânı âreste düzdün alan alsın ma’den imiş

Yûnus dahi uyanmadın kendi ölümün sanmadın
Bu doğru yola gelmedin her işleri gümân imiş