Kıl ziyâret Ka’be’yi cisminde sıhhat vâr iken
Rûz-i mahşer bir şefâ’at-geh de Beytullah’dır
‘Azm-i râh-ı Mekke eyle elde fırsat vâr iken
Rûz-i mahşer bir şefâ’at-geh de Beytullah’dır

Yerde Ka’be gökde şol ‘arş-ı mu’allâdır metâf
Kim anı eyler beşer bunu feriştehler tavâf
Cân u başla mal bezl it bu yola ol sîne saf
Rûz-i mahşer bir şefâ’at-geh de Beytullah’dır

Cezb-i Ka’be itmek için mahşere bunca melek
Elde zencîr zer ile irdikde Beytullah’a dek
Gitmeye tâ geçmeyince hacılar için dilek
Rûz-i mahşer bir şefâ’at-geh de Beytullah’dır

Çevresinde defn olup yâhud ziyâret ideni
Yalvarup Ka’be diye ki Yâ Rab ihsânın kanı
‘Afv ide her kim didi “lebbeyk lebbeyk” ol Ganî
Rûz-i mahşer bir şefâ’at-geh de Beytullah’dır