Bin iki yüz kırka irdi dahi dörde salimiz
Dinle sana söyleyeyim noldı bizim hâlimiz
****
Yaşım altmış ikiye olmış-ıdı baliğ henüz
Toldı ekdâr ile dünyâ artdı pek ahvâlimiz
****
Her tarafda fitne uyandı katı çoğaldı here
Gözimize hîç görinmez oldı mülk ü mâlımız
****
Fürce buldı çün bu târîhde katî a’dâ-yı dîn
Fitneden oldı belürsiz gadvimiz âsâlimiz
****
İtmez oldı nâs biribirine re’fet merhamet
Fark olunmaz ehl-i ‘ilm ü fazl-ıla cühhâlimiz
****
Bahr-i ebyaz bahr-i esvedde selâmet kalmadı
Bu sebeb ile perîşân oldı pes ahvâlimiz
****
Hak Te’âlâ bozdı bize virdiği ni’metleri
Çünki bozuldı bizim etvârımız ef âlimiz
****
Emr-i dînde gafil olduk emr-i dünyâda gayur
Var Hudânıfi buyruğın tutmakda hem ihmâlimiz
****
Ahiret kaydın yimez olduk unutduk mevti hem
Rûz u şeb tedbîr-i dünyâdır hemân eşgâlimiz
****
Hak rızâsi’çün ‘ilim tahsîline sa’y itmeyiz
‘İzzet-i dünyâ içündür ‘ilmimiz a’mâlimiz
****
Ağniyâmız cem’ iderler hırs-ıla sîm ü zeri
Hîç dimezler ‘ömrimiz az pek yakın âcâlimiz
****
Hayra bir dînân virmezler hezâr pend eyleseñ
Şerre biñ dînâr virirler lağv olur akvâlimiz
****
Gıll u gış sirkat hıyanet ekser-i nâsın işi
Gâlib oldı zümre-i ahyâra pes erzâlimiz
****
Bir kişi hayr işlese hîç kimse itmez ittibâ’
Ehl-i şerre tâbi’ olur fevc fevc ecyâlimiz
****
Kahve enfiyye tütün efyûn hamir buldı şüyu’
Bu ecilden oldı müzdâd gün-be-gün belbâlimiz
****
‘Adeti ebnâ’-yi vaktin gâlibâ fısk u fesâd
Söylemekde çok hatar var salim ancak lâlimiz
****
Giyüben erler harîri benzediler zenlere
Bunları gördikce vîrân oldı cism-i bâlimiz
****
‘Uzlet itdik gönlimizde yok ise de hîç huzur
İtdiler heb ihtifâ ebrârımız ebdâlimiz
****
Ol Hudâdan dileriz ki bizi ıslâh eyleye
‘Afv ide hem cürmimizi añadur idlâlimiz
****
Hem şefî’ ide habîbini şu biz gümrâhlara
Bulavuz gamdan selâmet biz dahi emsalimiz
****
Aña uyub gidevüz ol Hazret-i Gaffara hem
Mâsivâsından geçüb aña ola ikbâlimiz
****
İsm-i Gaffar eyle Kuddûsî tefe’ül eyleyüb
Didi kim elhamdülillah kâl-ı zîbâ kâlimiz

Ahmed Kuddusi