Bir hûba ‘âşık olmışam ki cümle halk müştak aña
Lâyık değil isem de ‘ışka lutf idüb virdi baña
****
Rûz-ı ezelde eylemiş ben kuluna anı nasîb’
‘Ubbâda virmiş cenneti ol sâhib-i fazl-ı ‘atâ
****
Pes itmişem feryâd ana rahminde işitmiş anam
Girmiş kulağına ‘ayânen ‘ışk u şevk-ile sadâ
****
Havf eyleyüb anam babama söyledikde ol dahi
Dimiş ki fazlıyla anı bahş eyledi bize Hudâ
****
Bir kez dahi çağırmışam anı işitmiş bir ‘acûz
Anam dimiş ki ey ‘acûz keşf eyleme bu sırrı hâ
****
Ru’yâda hem görmüş peder üç ay semâda hoş kamu
Ortadaki ayda çoğ-imiş behcet ü nûr u ziyâ
****
Aña dimişler bil bu ay oğlun ana rahmindeki
Halk-ı cihanın ekserin irşada olısar seza
****
Ana muhabbet eyleyen ‘âşıkları Mevlâ sever
Bulmaz felah her kim ider ise ana buğz u cefâ
****
Telkîn-i zikr ile aña irsün makâme tıfl iken
Hem eyle tenbîh ki hemân zikr eylesün ol dâ’imâ
****
Vakt-i sabâvetde baña tevhidi telkîn eyledi
Dir idi Kuddûsî çalış virdim icazet ben saña

Ahmed Kuddusi