Abdullah Tamamlar-Cahili Handan İder
Câhili handân ider ehl-i kemâli zâr zer
Kan yer âdem bu gülşende gül-i bî-hâr her
Neş’e-i yek lahzası âhir göze kan ağladır
Leb-be-leb pürdür mey ile sâgar-ı serşâr şer
Tâir-i firdevs-i a’lâdır şehîd-i ‘aşk olan
Buldu çün firdevs içinde Ca’fer-i Tayyâr yer
Cismini ‘aşka fedâ itdi serây-ı vuslata
Dârda buldu göçüp Mansûr olup berdâr der
Nâr-ı hicrân olmasın da yâr ile dûzahda ol
Himmetin seyr-i cinâna olmaz ise kâr ger
Almadıkça cânını cânân cân olmaz sana
Almaz ise ihtiyârıyla anı yalvar ver
Dil-şiken-gîr olma kim seng-i melâmetden hazer
Seng-sâr olsa sezâdır nahle-i pür-bâr ber
Fark iden îmân u küfrü nâkıs u zındîkdır
Hakk’ı tevhîd eyleyendir bağlanup zünnâr ner
Fehm it andan olduğun mağfûr ey târîk-i dil
Kalbini pür-nûr ider ‘afv itse ger Gaffâr fer
Hâme-i ‘azbü’l-beyânın Şems feyz-i ‘aşk ile
Söyledi bu şîve-i ‘irfânda güftâr ter

Yorumlar
Henüz yorum yapılmamış.