Çekelim niçe ise cevr ü cefâ her ne ki vâr
Kim bilir n’olacağın dünyâda çün âhir-i kâr

Geh vefâ geh cefâdır dün ü gün kevnin işi
Zıdd u nedd ile döner çarh-ı felek leyl ü nehâr

Dime râhat ola kimse iki gün bir yerde
Dâimâ evc ü hazîz üzre ider çarh-ı medâr

Kim ki kâm istedi almak bu dönen gerdunda
Ser-nigûn oldu serencâmı göre niçe hezâr

Vüs’at-i sahn-ı felek başına teng oldu anın
Firkat-i yâr ile her kim ki ide bunda karâr

Uymaya dehr Hayâlî sana sen uygıl ana
İstesen râhat-ı câvid olasın niteki vâr