Nazar kıldı yine lutf ile Allah
Diyelim dâimâ eş-şükrü lillah
İdüp sırrına vâkıf hâle âgâh
Diyelim dâimâ eş-şükrü lillah

İçirdi cür’asın bezm-i belâdan
Halâs itdi dil ü cânı belâdan
Geçirdi kalbimiz resm-i sivâdan
Diyelim dâimâ eş-şükrü lillah

Cemâli pertevi tutdu cihânı
Münevver eyledi cism ile cânı
N’ola eylerse zâtını nihânî
Diyelim dâimâ eş-şükrü lillah

Kusûruna nazar kılmaz ‘ibâdın
Açar yollarını râh-ı reşâdın
Murâdını virir her nâ-murâdın
Diyelim dâimâ eş-şükrü lillah

Anın emriyle devr eyler nüh eflâk
Kemâl-i kudretin ‘akl itmez idrâk
Nice şükr ide ana bir avuç hâk
Diyelim dâimâ eş-şükrü lillah

Kamu mevcûda sen virdin vücûdu
Sanadır cümlenin yine sücûdu
Umar bu haste-dil nûr-ı şuhûdu
Diyelim dâimâ eş-şükrü lillah

Fenâyî “külle yevmin hüve fī şe’n”
Bu remzin ma’nâsını eyle iz’ân
Anındır çün “yekûnü külle mâ kân”
Diyelim dâimâ eş-şükrü lillah