Dü cihânda zü’l-cenâheyn olmak istersen gönül
Sıdk ile teslîm ü te’dîb-vâr olup pîrâne gel

‘İlm-i tevhîd sırrını neşreyleyen dilden dile
Diler isen hâk-i pây-i hazret-i insâne gel

Rûh-i pâki der-ezel kâmil idi ‘âşıkların
Ten gılâfında tamâm tekmîl olan merdâne gel

Nûr-ı Hakk’ı Hazret-i Cânân gözüyle gözleyüp
Öz gözün a’mâ kıluben bir ‘azîm seyrâne gel

Defter ü dîvâne sığmaz metn-i insânı eğer
Şerh ide ashâb-ı ‘irfân deryâ-yı ‘ummâne gel

Ehl-i zevkin gönlü mir`ât-ı dilârâdır müdâm
Seyr ider kendi yüzün kendindeki sultâne gel

Lutfî’dir mahlas bana ismim Muhammed’dir güzel
Lutf idüp Tanrı Teâlâ ey gönül şükrâne gel