Ehl-i ‘aşka reh-i cânânede hâk-i pâyem
Hamdülillâh ki bu yolda kamudan a’lâyem

Yüzümü ehl-i fenâ hâkine cârûb ideli
Mihr-veş çarh-ı bekâ içre zıyâ-efzâyem

Mâsivâdan yumalı çeşm-i cihân-bînimi ben
‘Ayn-ı bî-basar ile yâr yüzüne bînâyem

Ümmetim derse bana şâh-ı Resûl fahr-i dü-kevn
Mülk-i câvid-i sipihrine hemân ‘Îsâ’yem

Nîl-veş kanlı yaşım ‘aşkınla oldu revân
Nefs-i Fir’avn’ı gark eylemede Mûsâ’yem

Niceler nâm-ı efendide hevâ kullarıdır
Hırsımı bende kılup mîr-i cihân-ârâyem

Gözüme katre değil bahr-i muhît-i melekût
Kûşe-i Kâf-ı kanâ’atde bugün ‘aceb ‘ankâyem

Gerçi ahter gibi alçakda görünür gönlüm
Himmetim ‘âlî olup mihr-i cihân-ârâyem

Tâc-ı terki urunup hâtem-i ‘aşkı takınup
Şeyhiyâ mülk-i kanâ’atde bugün Dârâ’yem