Eylemez ‘âşık olanlar hûy u hâya iltifât
Sen de ey dil eyleme hergiz hevâya iltifât
Sâlike lâyık değil zevk u safâya iltifât
Ehl-i diller itmediler mâsivâya iltifât

Hakk’a ‘âşıksın eğerçi ey gönül da’vâ ile
Âşinâlık kılmadın bir dem velî Mevlâ ile
Nice bir dil-bestesin sen Sidre vü Tûbâ ile
Ehl-i diller itmediler mâsivâya iltifât

Hakkıyâ dünyâ vü ‘ukbâ cisrini eyle ‘ubûr
Bu fenâ vâdîlerinden idegör evvel mürûr
Âkil isen olmagıl ‘aşk-ı Hudâ’dan zerre dûr
Ehl-i diller itmediler mâsivâya iltifât