Ey ‘Azîz ü Müntakim men eylerem şekva saña
Şol kişilerden ki dâ’im işleri nâsa cefâ
****
Çok emek çekdim ki irşâd eyleyem anları pes
Olmayub irşada lâyık oldılar düşman baña
****
Aşikâre fışkı eylerler o fâsıklar hemân
Eylemezler çünki senden havf dahi halkdan haya
****
Ehl-i ‘ilmi iden istihfaf olur kâfir o dem
‘Avreti boş cümle a’mâli dahi olur heba
****
Ekserinde yok devam tîz bozılur dostlıkları
Söyledi Hakkı deyü küfre iderler ictirâ
****
Şetm iderler buğz iderler ehl-i ‘ilm ü ‘ırza hem
Kati iderler güçleri yiter ise ol eşkıya
****
Ehl-i ‘ırz havf eyleyüb kurtdan koyun korkar gibi
Ağlaşurlar inleşürler ditreşürler dâ’imâ
****
Korkmayub hem pâdişâhdan ol gürûh-ı tâğiyân
Zann iderler başımıza hîç bizim gelmez kazâ
****
İtdi Kuddûsî bugün şekva saña ey Müntakim
Yetmiş üç yıl eyledi yardım kamu hâlde aña

Ahmed Kuddusi