Ey bizim ihvânımız eyleyelim nûş-i câm
Ki şeh-i hûbânımız ide bizi şâd-kâm

Terk-i sivâ idelim dostumuza gidelim
Gayrı sözü nidelim zikr idelim subh u şâm

Zühdü idüp târ-mâr isteyelim ‘aşk-ı yâr
Hem idelim ihtiyâr olmağı mest-i müdâm

Ad ile sandan geçüp iki cihândan geçüp
Cism ile cândan geçüp bilmeyelim hâss ü ‘âmm

İtmeyelim hultatı eyleyelim ‘uzleti
Terk idelim sohbeti yolcuya sohbet harâm

Her kime kim ‘aşk gelir kadrini şâhın bilir
Bende vü mukbil olur bulısar a’lâ makâm

Zühdüne mağrûr olan zâhidin işi yaman
Bildiği zann u gümân keşfi kamu ihtilâm

‘Âr şîşesin kıramaz Hakk yoluna giremez
Menzile hem iremez yolda kalır ve’s-selâm

Pendini Kuddûsîyâ eyle hemân sen sana
Kim ki tutarsa ana Tanrı virir ‘aşkı tâm