Ey gönül çatmadı sana kimse baş
Bâri durma yalınız bellerden aş

Cehd kıl kim irişesin menzile
Niçe bir aka gözünden acı yaş

Halk-ı ‘âlem hâline aldanmagıl
Sana matlûb olmayısar bir kumaş

Key sakın bend olma hîle bendine
Dime ehl-i beyt oğul kız karavaş

Merd olup merdâne gir meydâna sen
Ya bu yolda bite iş ya kopa baş

Ol bekâdan bu fenâya şol Ganî
Niye saldı kıl tefekkür gizli fâş

Mâl ü mülk ü ehl-i beytin ne ki var
Bağlamak ister seni idüp savaş

Key sakın aslından ırma özünü
Her ne kılarsan kılup ‘aşka ulaş

Ol bekâ mülkünde bâkî kalmağa
Dü cihân nakşını dilden kıl tırâş

Ol tükenmez kenze mihmân olmağa
Ger olasın ‘aşk önünde ke’l-ferâş

Kurtaram dirsen başı Ümmî Sinân
Cümle şeyden arınup ‘aşka bulaş

Ümmi Sinan