Huzûr-ı yârda gavgâ-yı ağyâr eylemek olmaz
Güle karşı hezâra şekve-i hâr eylemek olmaz

Tahammül güçse de derd-i rakîbe hâl-i düşvârı
Sakın sû-i edebdir yâre izhâr eylemek olmaz

Muhabbetden garaz cânı fedâdır dergeh-i yâre
Cefâdan ‘âşık-ı şûrîde-dil zâr eylemek olmaz

Açıldı göz göz oldı nûr-ı ‘aynım işledi câna
Bir iki yâre var gönlümde tîmâr eylemek olmaz

Nühüfte ‘âlem-i ‘aşkın nice hâlâtı var ammâ
Değil ağyâra yâre keşf-i esrâr eylemek olmaz

Şeref sorma melâlim anla hâlim eşk ü ye’simden
Tükenmez mâcerâ var dilde ısrâr eylemek olmaz