Cânımın cevheri ol la’l-i güherbâre fidâ
‘Ömrümün hâsılı ol şîve-i reftâre fidâ

Derd çekmiş başım ol hâl-i siyeh kurbânı
Tâb görmüş tenim ol turra-i tarrâre fidâ

Gözlerimden dökülen katre-i eşkim güheri
Leblerinden saçılan lü’lü’-i şehvâre fidâ

Çâk-i sînemde olan kanlu ciğer pâreleri
Mest çeşminde olan gamze-i hûnhâre fidâ

Pâre pâre dil-i mecrûh-u perîşânımdan
Ser-i kûyinde gezen her ite bir pâre fidâ

Cân ü dil kaydını çekmekden özüm kurtardım
Cânı cânâneye itdim dili dildâre fidâ

Ey Fuzûlî n’ola ger saklar isem cânı ‘azîz
Vakt ola kim ola bir şûh-i sitemkâra fidâ