Gâh kendüme gelürem gâh yavi kılınuram
Gâh yok ile yok oluram gâh varlıkta bulunuram
****
Gâh denizlere düşerem mevc urup taşra taşaram
Gâh nadan eline düşerem kem behaya alunuram
****
Gâh çıkaram bu göklere dönerem çarh ile bile
Gâh ay ile bedr oluram gâh gün ile dolanuram
****
Gâh nebar olup biterem gâh toprak olup yataram
Gâh et gah kan sünük olup hep tenlerde çalkanuram
****
Gâh Arafat’a çıkaram “lebbeyk” urup baş açaram
Gâh kurban yerine gelüp koç olup boğazlanuram
****
Gâh hanigahta sofiyem gâh meyhanede fasikem
Gâh raksa girüp dönerem gâh saz olup çalunuram
****
Gâh onaram gâh azaram bu halk içinde gezerem
Gâh şah olup şahbaz olup şikâr edüp avlanuram
****
Gâh çevgan elüme alup girerim aşk meydanına
Gâh top olup Dost önünde şarktan garba yuvarlanuram
****
Gâh hassül has oluram gâh Hızır İlyas oluram
Yürürem yaşta kuruda yüklülere bölünürem
****
Gâh deniz gâh göl oluram gâh Sultan gâh kul oluram
Gâh bahar u gül oluram elden ele yulanuram
****
Gâh şakird ü gâh üstadem gâh dadsitan u geh Âdem
Gâh Şirin gâh Ferhadem kaya kesüp eğlenürem
****
Gâh av geh avcı oluram gâh yol geh yolcu oluram
Gâh yürürem gâh araram menzil menzil dinlenürem
****
Gâh ne menzil var ne makam ve ne vücud var ne a’dem
Hak’tan gayrı yok vesselam ya ben kande dolanuram
****
Gâh muti’ gâh asiyem gâh âlim gâh amiyem
Gâh Eşrefoğlu Rumi’yem bu dillerde söylenürem

Eşrefoğlu Rumi