Mecâz içre hakîkat hayrın anla şûr-ı şerden geç
İrüp ıtlâka ma’nâya kuyûdât-ı suverden geç

Eserden görünür feyz-i Müessir çeşm-i ‘ibretle
Müessir cilvesin gözle merâyâ-yı eserden geç

Hakîkatde hatar ancak senin zenb-i vücûdundur
Vücûd-ı Hakk’da gel mahv-ı vücûd eyle hatardan geç

Dinildiyse eğer varlık hicâbın geçmek elzemdir
Sana kim dir ‘ibâdet itme ezkâr-ı seherden geç

Soyun varlık libâsından kadem bas râh-ı tecrîde
İriş fakr u fenâ vâdîsine tâc u kemerden geç

Dürüş a’mâl-i hayra rü’yetinden ihtirâz eyle
Mürìd-i Hakk olup ağyâra bakma nef’ ü dardan geç

Salâhî rağbet-i cennâta gel hasr itme a’mâli
Rızâ-cû-yı Hudâ ol rehbet-i nâr-ı sakardan geç