Abdullah Tamamlar-Geh Vahi Geh Sahra Olur

Geh vâdî geh sahrâ olur geh katre geh deryâ olur
Hergiz karâr itmez döner gâh kûh olur gâh kâh olur

Geh bay u geh yoksul olur geh hâce vü geh kul olur
Geh raht olur geh kârubân geh rehzen ü geh râh olur

Gâhî olur yavlak fakîr bî-çâre vü hôr u hakîr
Gâhî hayâl ü fikr ile cümle cihâna şâh olur

Gâhî kanâ’atdir işi gider bu dünyâ teşvîşi
Gâhî dolar hırs u tama’ maksûdu milk ü câh olur

Gâhî sever bu dünyeyi direr dükeli nesneyi
Gâhî kamusun terk ider yirer işi ikrâh olur

Gâhî azar endîşesi tûl-i emeldir pîşesi
Gâhî gelir hoş tevbeye endîşesi kûtâh olur

Gâhî olur yavlak delü gider kamu ‘akl u bili
Gâhî gelür ki ‘ilm ile her nesneden âgâh olur

Gâhî olur ehl-i riyâ tâ’atleri sehv ü hatâ
Gâhî kılar hâlis ‘amel tâ’atleri lillah olur

Gâhî karanudur katı dün gibi olur zulmeti
Gâhî münevver gün gibi hoş âfitâb u mâh olur

Gâhî ağar ‘Îsâ gibi göğe vü seyr ider göğü
Gâhî yiri Yûsuf’leyin zîr ü zemîn ü çâh olur

Âh kim bu hercâyî gönül hergiz bana hem-dem değil
Ancak bu âvâreliği şimdi değil her gâh olur

Bir yirde hiç ârâmı yok çevre yana seyrânı çok
Bir yir kanı kim ol bana bir lahza menzilgâh olur

Yalvar Kemâl Ümmî ana kim seni fazl ile ana
Zîrâ ki ‘âciz kulların yarıcısı Allah olur

İki cihânı bir gönül sıdk ile kaplar şek değil
Vallah zihî tan nesne ki nice ulu dergâh olur