Gel Hakk’a feryâd idelim her bâr zikrullah ile
Dil şehrin âbâd idelim mi’mâr-ı zikrullah ile

Kalbiñ kapusun uralım rûhun safâsın sürelim
Hakk’ın cemâlin görelim envâr-ı zikrullah ile

Derd ile gûyâ olalım ‘aşk ile deryâ olalım
Mezkûr-ı Mevlâ olalum iksâr-ı zikrullah ile

Bulmak diler isen safâ yüz tutalum Hakk’dan yana
Dostu analım dâimâ tekrâr-ı zikrullah ile

Zikre idenler himmeti def’ itdi cümle ‘illeti
Bîçâre buldu sıhhati tîmâr-ı zikrullah ile